Bei ya mafuta ya petroli imeendelea kupanda nchini, huku jijini Dar es Salaam ikiongezeka kwa Shilingi 295 ndani ya mwezi mmoja na kufikia Shilingi 4,115 kwa lita mwezi Mei 2026, kutoka Shilingi 3,820 mwezi Aprili.
Kwa mujibu wa Mamlaka ya Udhibiti wa Huduma za Nishati na Maji (EWURA), ongezeko hilo linaakisi msukumo mkubwa kutoka soko la dunia, hususan mgogoro unaoendelea Mashariki ya Kati unaohusisha mataifa ya Marekani, Israel na Iran.
Mgogoro huo umeathiri uzalishaji na usambazaji wa mafuta baada ya kushambuliwa kwa miundombinu muhimu pamoja na kufungwa kwa Mlango wa Hormuz, unaopitisha takribani asilimia 20 ya mafuta ya dunia.
Katika mikoa mingine, bei zimeendelea kuwa juu zaidi kutokana na gharama za usafirishaji:
Tanga: Petroli Tsh 4,176
Mtwara: Petroli Tsh 4,207
Kigoma: Petroli kati ya Tsh 4,374 hadi 4,382
Tofauti ya bei kati ya Dar es Salaam na Kigoma sasa imefikia zaidi ya Shilingi 250 kwa lita, ikionyesha mzigo mkubwa kwa wananchi wa maeneo ya pembezoni.
EWURA imeeleza kuwa katika soko la dunia, bei za mafuta yaliyosafishwa zilipanda kwa kasi mwezi Aprili 2026, ambapo petroli iliongezeka kwa asilimia 71, dizeli asilimia 117 na mafuta ya taa asilimia 122.
Pamoja na ongezeko hilo, Serikali imetoa ruzuku ya takribani Shilingi 259 kwa lita ya dizeli ili kupunguza athari kwa sekta za usafirishaji na uzalishaji.
Hata hivyo, kupanda kwa bei za mafuta kunatarajiwa kuongeza gharama za maisha kwa wananchi kutokana na athari zake katika usafiri na bei za bidhaa mbalimbali.