Rais wa Jamhuri ya Muungano wa Tanzania, Mhe. Dkt. Samia Suluhu Hassan, amesema Serikali yake itaendelea kuimarisha diplomasia, amani ya kikanda, na maendeleo jumuishi huku ikizingatia misingi ya uhuru, katiba, na mshikamano wa kitaifa.
Akizungumza na mabalozi na wawakilishi wa jumuiya za kimataifa katika Sherehe za Mwaka Mpya 2026 zilizofanyika Ikulu ya Chamwino jijini Dodoma leo Alhamisi Januari 15, 2026, Rais Samia anesema Tanzania inaamini kuwa mazungumzo, ushirikiano, na mifumo ya kimataifa ni muhimu kwa amani na maendeleo licha ya changamoto za kimataifa zinazojumuisha migogoro, hali ngumu ya uchumi na athari za mabadiliko ya tabianchi.
Rais Samia amesema diplomasia ya uchumi imekuwa kielelezo cha sera za taifa, zikilenga kuvutia uwekezaji, kuimarisha ushirikiano kati ya sekta ya umma na binafsi, na kupanua sekta za kipaumbele kama viwanda, madini, nishati, kilimo, na utalii.
Aidha, Rais Samia ameeleza hatua za Serikali katika kuimarisha mshikamano wa kitaifa, ikiwemo kusamehe wafungwa 1,787 waliohusishwa na machafuko ya uchaguzi wa Oktoba 29, 2025, kuunda Tume Huru ya Uchunguzi kwa mujibu wa Katiba, na kuahidi kuanzisha Tume ya Ukweli na Maridhiano kama sehemu ya mchakato wa Katiba Mpya.
Rais Samia ameendelea kwa kusema kuwa, uchumi wa Tanzania unaendelea kukua kwa kasi, huku Pato la Taifa likikaribia asilimia 6, mfumuko wa bei ukiwa katika kiwango cha asilimia 3.3, na deni la taifa likibaki chini ya kiwango cha hatari cha asilimia 55.
"Mwaka 2025, Tanzania ilisajili miradi mipya ya uwekezaji 927 yenye thamani ya zaidi ya Dola za Marekani bilioni 11, miradi inayotarajiwa kutoa ajira zaidi ya 162,000 kwa Watanzania." alisema Rais Samia na kuongeza
"Sekta muhimu za uchumi kama madini, kilimo, na utalii zimetajwa kuonyesha ukuaji mkubwa, huku mapato ya utalii yakifikia Dola za Marekani bilioni 4 ifikapo robo ya tatu ya mwaka 2025. Tanzania pia ilipata heshima kama kisiwa cha utalii kinachoongoza duniani katika World Travel Awards 2025, ikithibitisha umuhimu wake kama sehemu salama na ya kuvutia kwa wawekezaji na watalii."
Vilevile amesisitiza kuwa Tanzania itaendelea kuwa mshikamano wa kikanda katika Jumuiya ya Afrika Mashariki, SADC, na Umoja wa Afrika, akibainisha kuwa maendeleo ya kikanda hayawezekani bila amani na mshikamano wa pamoja.
Kwa kumalizia, Rais Samia amewahakikishia mabalozi na jumuiya ya kimataifa kuwa Tanzania itaendelea kuwa nchi thabiti, salama, na rafiki kwa uwekezaji, diplomasia, na ushirikiano wa maendeleo, huku ikijenga imani na mshikamano wa kimataifa.